WILLEMSTAD.- Faiiola Frey, 28 aña, mihó konosí komo MC Jolla, a nase na Kòrsou i ta studiando pa kasi 10 aña kaba na Rotterdam, Ulanda.
Faiiola su nòmber artístiko ta MC Jolla ku el a estrená den luna di Desèmber 2019 na momentu ku el a kolaborá ku Desperado pa produsí #FuegoFuego ku a bira un Mega Hit pa fin di 2019i inisio di 2020.
Aktualmente MC Jolla ta kabando su estudio pa ‘Entrepreneur’ p’asina e por kontinuá ku su bida, pashon i karera kual ta ser un artista musikal, esaki ta enserá kanto, baile, aktuashon i tambe ‘Afro modelo’.
Faiiola semper tabata un persona ku super hopi energia i un persona positivo ku ke yega riba e tarima internashonal ku su karera. Aworakí MC Jolla ta hasiendo su promé stapnan den e mundu artístiko i ta hasi esaki ku trankilidat i ta sòru pa skucha for di esnan ku tin mas eksperensia riba e tereno aki.
MC Jolla a hasi diferente kurso i eventonan di arte serka artistanan konosí manera: Tio Ali, Albert Schoobaar, Roland Colastica i tambe Norma Cova.
Faiiola Frey su género di músika ta; Dancehall, Reggae, Soca i Roadfire, aserka MC Jolla ta dominá e instrumènt di blòkflùit.

#My Cura’s
Den e siman aki MC Jolla a lansa su promé piesa titulá “ My Cura’s ”, e piesa ta un petishon pa huntu e pueblo di Kòrsou forma ‘Patria’. ‘Nos tin tur kos i e úniko kos ku nos tin ku traha riba dje ta pa ser un Pueblo i un Nashon. Ku amor, pas i trankilidat nos ta yega sigur. Kada kos ku nan tempu i époka’. E kansion ta produsí pa Jerry Ignacio.
Keda pendiente, paso nos por spera mas di MC Jolla. Ta pendiente algun produkshon ku sigur lo bira ‘mega hit karibeño’ ku e ritmo di Soca i tambe Roadfire.
Por sigui tur desaroyo di MC Jolla riba retnan sosial via: Facebook: Faiiola ‘Jolla’ Frey;
Instagram: mcjolla.official; Linkedin: Faiiola Frey i Tiktok: Jollafrey_official.