WASHINGTON, AP.- Tin hopi trabou pa hasi pa yega na un akuerdo komersial entre Merka i China, spesialmente riba e área di implementashon, segun deklarashon di e representante komersial di Merka.
“Ainda tin hopi pa hasi promé ku nos yega na un akuerdo”, asina e funshonario, Robert Lighthizer a bisa na un komishon di Kongreso.
“Si nos yega na un solushon satisfaktorio riba e tema di implementashon, nos por formulá un akuerdo ku ta marka e diferensia den nos relashon ekonómiko ku China”, asina el a agregá.
Presidente Donald Trump a ekspresá su speransa ku lo no tin un akuerdo, deklarando ku a logra un avanse “sustansial” despues di e negosiashonnan ku a dura e fin di siman kompleto.
Sinembargo, e deklarashonnan di Lighthizer ta revelá ku e partinan no ta serka di yega na un entendimentu. E funshonario a agregá ku Merka kier un kambio struktural den e polítikanan chines, manera fin di robo di sekretonan komersial di Merka riba e tereno di informátika. Ademas, e pais kier limitá e sosten estatal pa empresanan chines i un fin na e práktika di obligá empresanan merikano pa kompartí nan teknologia komo kondishon pa haña akseso na e merkado chines.
