WILLEMSTAD – Famianan di defuntu Jarzinho Pieter, kiper reserva di nos selekshon nashonal, a informá awe den un aviso di morto ku e kurpa ta planeá pa yega Kòrsou mayan. Si tur kos kana segun plan entiero di Pieter lo tuma lugá djaluna awor. Esaki lo keda regla via di El Tributo. Konfirmashon  di unda i orario di esaki lo mester keda konfirmá pa mas despues. Den e aviso famianan ta usa sita e siguiente frase na spañó: “No siempre se calla para guardar silencio; a veces se calla para guardar estar en paz. A veces estar en paz, es mejor que tener razón” .

...Jarzinho Pieter (dfm)...

Manera ya ta konosí Jarzinho Pieter a bin fayesé na Haiti dia 9 di sèptèmber den su kamber di hotel Marriott unda  e delegashon/selekshon nashonal di Kòrsou tabata hospedando pa hunga e wega su siguiente dia. Tabata intenshon pa hasi outopsia di e kurpa di Pieter aya na Haiti. Debí na e situashon volatil di e pais asotá pa wèlga a tarda pa esaki keda konkretisá. No ta konosí ainda si famianan a risibí resultado di e outopsia of si esaki a tuma lugá.

Jarzinho Saul Emmanuel Pieter (11-11-1987) ta di bario Juan Domingo. Den su añanan hubenil el a militá den Vesta i UNDEBA, pa despues pasa pa Centro Dominguito ku kua na vários okashon el a titulá kampion. Pa kampionato 2018-19 el a hasi su regreso den Vesta i dia 11 di ougùstùs último a yuda e ekipo di Sta. Maria gana nan promé título ora ku el a para 3 penalty (tempu reglamentario a kaba 0-0) pa e promé título di kampion den historia di Vesta. Meresidamente el a gana premio komo ‘Man of the Match’. Praktikamente hinter su karera el a figurá den selekshon, promé selekshon Hubenil i sigur último 10 aña den selekshon di FFK. Jarzinho Pieter a fayesé lagando 2 yu.

Un grupo di amigu di Jarzinho Pieter ku bendishon di su famia, a disidí di tuma e inisiativa pa no solamente duna Pieter tur honor ku e meresé, pero alabes ku apoyo di henter pueblo di Kòrsou hasi un fundraising ku e meta pa krea fondo pa e dos yunan dje defuntu kiper di Vesta i di selekshon nashonal di Kòrsou. Ku kreamentu di e fondo aki na mente, e grupo “Amigunan di Pieter” a laga diseñá un T-shirt speshal ku nòmber di Pieter i su number 22 riba dje, ku e lema di Pieter “Love Puro Papa”.

E idea ta pa pueblo di Kòrsou huntu ku famia di Pieter bisti e T-shirt aki na su entiero honor na e defuntu i pa rekordá e gran kiper ku e tabata pa no solamente nos selekshon nashonal pero tambe pa su ekipo lokal ku ta Vesta. Ku e sosegá na pas.