MERKA.- Un fanátiko rabia a entrega keho kontra di kantante Gwen Stefani, esaki despues ku ela kibra su pia durante di un konsierto ku e artista a duna i ku esaki ta pa falta dje artista.
Lisa Stricklin, tabatin un lugá di sinta durante dje konsierto. Tur kos a bai bon te na momentu ku Stefani a pidi e públiko pa bin dilanti, anto bisando nan ‘No wòri ku e stulnan, nos por kumpra nobo’. E públiko a duna oido na e petishon dje kantante i a drenta e área kaminda públiko por a sinta i asina Stricklin a keda leshoná.
Stricklin mester a keda operá i despues di esaki paga un montante pisa pa revalidashon.
Den e keho ku a ser duna ta ser bisa ku Stefani tabata sa ku ela hasi robes, esaki abase di un komentario ku ela duna indikando ku ela hinka su mes den problema dor di pidi e públiko pa bin dilanti.
Stricklin no a entrega keho solamente kontra di Stefani, pero tambe kontra dje organisadónan dje evento ku ta ‘Live Nation’. Segun informashon e dama aki tin un montante astronómiko pensa pa pidi komo daño i perhuisio.