WILLEMSTAD.- Ayera e konosido músiko, dosente i promotor, Roderick ‘Vader’ Volk a skibi un artíkulo riba su página di facebook ku a sòru pa basta reakshon. Ku su outorisashon nos ta pone esaki den korant pa dje forma ei mas hende por tuma nota di esaki. E artíkulo ta relatá e situashon aktual den farándula di Kòrsou.
Aki ta sigui e relato di ‘Vader’ ku nos a ‘quote’:
Manera nos tur sa ku Farándula di e género di Ritmo Kombiná ta pasando den momentunan duru último añanan. Tiki tiki e interes a keda baha i dezèmber aki tabata e Dezèmber ku e farándula aki a haña su sla di mas duru den Historia di farándula baliabel.
Baidó di Fiesta
Den bida bo ta pasa den diferente etapa. E etapa di Bati Kaya ta na momentu ku bo hasi 18 aña te ku 25 aña. Despues bo ta kuminsá haña otro interes yu, kas, trabou pa menshoná algun.
Na e momentunan aki e generashon ei su interes NO ta den Ritmo Kombiná pero den músika Urbano. Esaki ya pa basta aña kaba. I dor di esaki e Farándula di Ritmo Kombiná a keda biba den su pasado. Laga mi menshoná algun ehèmpel;
Qsign Melowstreet; Luwi ku Tico den frònt di GIO; Randy-Ivanhoe ku Qshans den frònt di Caché òf GENTZ; Roald-Clarck ku Lèlè den frònt di GIO i BDM(No Game).
Eseinan ta fiestanan grandi ku a dal duru. Tur loke ta aktualidat no tin forsa.
Fanátiko
Binti aña pasá ku e interes tabata grandi pa Ritmo Kombiná tur banda tabatin nan fanatikada. Riba un djasabra den Saliña bo por a buta; Magic Sound den Chobolobo, OK Band den The Pub, ERA den Studio 99 i GIO den Facade. Tur tabata yen. Ainda bo tin Rizam den kueba di Hato òf Café Baranka.
Promotor
Antes un promotor tabata sa kiko e tin na kada Banda. Paso tur Banda tabata tin nan fanátiko fiho. Si bo ‘book’ 'No Game, bo sa ku tin 500 mucha yòn fiho nan tras, si bo ‘book’ GIO bo sa kiko bo tin na nan. Aworakí e promotor mester ta kreativo pa pensa un konsepto pa hala hende. Paso e bandanan riba nan mes NO tin fanatikada. Ta Fiestanan ku nòmber so ta hala hende último añanan: Emporia; Flight; Dulce Caliente; Jetset;
Lights down Low; Ets ets.
E Problema di mas grandi
Antes ku e interes tabata haltu den Ritmo Kombiná, e banda di mas karu tabata salí bo 3000 florin. Aworakí ku Farándula ta malisimo bandanan ta biba den Nubia: 6500 florin, 10 mil florin i 12 mil florin.
Ke men nos a hasi e kos nèt kontrali. Den gloria dia e interes tabata haltu nos a kobra 3000 i awó ku NO tin interes kasi mes nos a subi bira Double, Triple òf Kuater biaha mas karu.
Esaki ta pone ku NIUN promotor no ta bai ‘Gok’ kombinashonnan fuerte pasó e rísiko ta muchu haltu. Un ‘kostenplaatje’ di 60.000 florin si bo tin 1000 hende ainda bo no a ‘break even’.
Pa mi menshoná algun Banda ku ta drai salú ta ERA, Dolce i Highway Band (tin algun mas). Dikon? Pasó nan preis ta rasonabel na moda ku un propietario di un Kafetaria por ‘book’ nan i saka su sòm for di entrada di bar, hende muhé grátis, hòmber 10 florin etc etc.
2019
Si bandanan ke keda eksistí òf ke pa promotornan ‘book’ nan i pa hala hende, nan tin ku baha nan preis drástikamente ya asina preis di entrada tambe por baha na moda ku e ta bira atraktivo pa e bailadó.
Kue un ehèmpel riba Dolce, ERA òf Highway Band pa menshoná algun ku ta toka den lugánan chikí i asina traha riba un fanatikada. Si bo ta kosta 6.000 òf 10.000 florin ta den lugá grandi so por ‘book’ bo.
No komprondé mi malu
Mi no ta bisa ku bosnan NO tin Balor, pero e merkado no ta permití.
Si bo ke kobra 10.000 florin bo mester por prueba e promotor ku tur kaminda ku bo toka tin 800 hende bo tras. Pero aktualmente esei NO ta e kaso. Bandanan no tin ni 75 hende FIHO nan tras.
Mi ta spera ku nos tur su wowo a habri i mira e realidat i pa 2019 tur hende Baha fo’i nubia i bini tera bèk.
I por último bailadónan kòrda sostené loke ta di nos.
Mi opinion:
Roderick Vader Volk