WILLEMSTAD.- Ku masha satisfakshon i ku gran plaser organisashon di Curaçao North Sea Jazz Festival atrobe por anunsiá e nòmbernan nobo pa e di ocho edishon di e festival ku lo tuma lugá riba dianan 30 i 31 di ougùstùs i promé di sèptèmber di aña 2018. Riba djaweps 30 di  ougùstùs Farruko a keda añadí na e programa di festival. Ademas di esei tambe Damian Marley i Grace Jones ta bini Kòrsou e aña aki. Den mesun rosea por anunsiá tambe ku tur konfiansa binida di Patti LaBelle, KC & The Sunshine Band, Kamasi Washington i Burt Bacharach.
Farruko, su nòmber berdadero ta Carlos Efren Reyes, nasé na Puerto Rico, ta un kantante di músika pòp i di reggaeton i di mes di músika Latino. Ya na edat di 16 aña el a kuminsá bou di su nòmber artístiko pone su piesanan musikal riba MySpace. Entre tantu ya e tin seis álbum riba su nòmber i el a keda nominá vários bes pa e galardon di Latin Grammy Awards.
Damian “Jr. Gong” Marley ta e yu mas chikitu di Bob Marley; e tabatin apénas dos aña dia su famoso tata a fayesé. Damian a haña e nòmber di kariño  ‘Jr Gong’ na honor di su tata Bob, o sea ‘Tuff Gong’. Marley a saka na yüni di aña 2017 su di kuater álbum Stony Hill , ku a sòru pa e haña su di tres Grammy tras di otro siendo ku esaki a resultá e mihó albùm di  Reggae.
Ku hitnan manera I’ve Seen That Face Before, La Vie en Rose, Pull Up To The Bumper i To The Rhythm Grace Jones a definí den añanan ’80 e esenanan di pòp i e esenanan di baile. Su último álbum Hurricane ya ta data for di aña 2008, pero Jones no ta keda sinta ketu: realidat ta ku el a hasi un gira e zomer ku a pasa ei pa  festivalnan di Europa i el a traha na 2017 huntu ku e banda virtual britániko Gorillaz.
KC and The Sunshine Band ta un banda merikano di e  estilo ‘disco i funk’ ku a keda nombrá manera ta e fam di  Harry Wayne Casey (KC) y e nòmber di kariño di su estado kasero Florida (‘the Sunshine State’). Despues ku nan a estrená na  aña 1973 e banda a bira famoso ku hopi hit grandi, entre otro: That’s the Way (I Like It), (Shake, Shake) Shake Your Body, Keep it Comin’ Love, Get Down Tonight, Please Don’t go i Give It Up.

CNSJ Festival 2018
Curaçao North Sea Jazz Festival 2018 ta tuma lugá na World Trade Center Piscadera Bay i e programa ta lo siguiente: Djaweps 30 di ougùstùs presentashon di Silvestre Dangond i Farruko. Djabièrnè 31 di ougùstùs:  Jason Derulo, Sean Paul, Patti LaBelle, Damian “Jr. Gong” Marly, Spyro Gyra, Kamasi Washington. Djasabra 1 di sèptèmber: Carlos Vives, Grace Jones, KC & The Sunshine Band, Burt Bacharach i  Michel Camilo Trio.