FBI TA ENTREVISTA CLINTON RIBA SERVER PRIVA DI ‘E-MAIL’

WASHINGTON, AP.- FBI a entrevistá Hillary Clinton djasabra, relashoná ku e ‘server’ privá ku el a usa pa manda ‘ e- mailnan’, na momentu ku e tabata sekretaria di Estado. Asina un ekipo di su kampaña a informá.
Clinton, e kandidato presidensial demókrata, a partisipá na un entrevista durante 3 ora i mei di forma boluntario den ofisinanan sentral di FBI na Washington. Asina su ekipo di kampaña a indiká.
“E ta kontentu di por a yuda e Departamentu di Hustisia pa konkluí e asuntu asina”, segun e bosero di Clinton, Nicki Merril. “Pa rèspèt di e proseso di investigashon, e no ta hasi ningun deklarashon tokante e entrevista.
E boseronan di FBI i Departamentu di Hustisia, a ninga di duna deklarashon riba e tema aki.
Pa Clinton, e entrevista ku FBI ta un indikashon ku e final di e investigashon di un aña ta yegando su final. Falta solamente kuater siman pa deklar’é formalmente komo kandidato presidensial pa remplasá e mandatario Barack Obama.
E interogatorio informal di FBI pa ku Clinton tabata previsibel i ni Clinton, ni niun hende mas mester enfrentá huisio pa e asuntu di ‘e-mail’.