WILLEMSTAD.- Den un enkuentro ameno direktiva di Federashon Deporte i Olímpiko Kòrsou (FDOK) a reuní ku dos dje atletanan olímpiko ku a keda Kòrsou un par di dia mas, kual nan ta Churandy Martina i Terrence Agard. Tabata un sekshon di interkambio di idea kon e atletanan aki por aportá pa hisa e nivel di deporte na Kòrsou i en partikular di atletismo.

  For di e diferente ideanan a resaltá ku nan ta proponé ku mester bini bèk ku deporte eskolar i kompetensianan intereskolar. For di e kompetensianan aki por sali muchanan ku hopi talento. Ta den skol tin hopi di e muchanan ku talento ku por wòrdu skohé i stimulá pa drenta un klup pa sigui desaroyá nan talento.  Sin deporte eskolar ta bira difísil pa haña e muchanan ku talento. Ta keda na un amigu òf e mayor pa hiba e mucha un kancha deportivo. 

 Tambe a bini dilanti ku si nos ke papia di deportista di haltu rendimentu, e deportista mester wòrdu yudá pa e por train i kompetí lokal i internashonal ku tur rekisitonan ku esaki ta eksigí pa e por logra éksito. No ta posibel pa e logra, si e tin ku traha, kaba bai train atardi. For di e enkuentro aki FDOK por a risibí un bista kla kon e atletanan aki ta biba i train na Hulanda. Si Kòrsou ke logra atletanan di haltu rendimentu ta den e direkshon aki mester ke bai. 

 A palabrá ku e atletanan aki ku lo sigui seshonnan di deliberashon ku FDOK pa wak kon nan por duna nan aporte pa mehorá e nivel di deporte aki na Kòrsou. FDOK ta trahando riba un plan nashonal pa deporte na Kòrsou.