AUSTRALIA.- Manera ta konosí selekshon di Kòrsou lo partisipá den e FIFA Series ku lo tuma na Australia den luna di mart. Esaki kaminda nan lo hunga dos wega amistoso kontra e selekshonnan di China i Australia. FIFA Series ta un torneo di weganan amistoso entre selekshonnan di diferente konfederashon. FIFA ta organisá esaki i alabes ta manda invitashon pa selekshonnan.

E promé wega di selekshon di Kòrsou lo ta djabièrnè 27 di mart, ora ku nan enfrentá e selekshon di China pa 2or di mardugá ora lokal aki na Kòrsou. E wega akí lo tuma lugá na Accor Stadium na e siudat di Sydney.

China na e momentu aki ta okupá e di 93 puesto riba ‘ranking’ di FIFA, ku ta mas abou ku e di 81 lugá ku Kòrsou ta aktualmente.

Miéntras di dos partido lo ta kontra Australia, ku lo sirbi komo un bon tèst pa selekshon di Kòrsou. Esaki mirando ku e selekshon australiano ta di un bon nivel, i lo yuda selekshon di Kòrsou den nan preparashon pa Mundial.

Australia tambe a klasifiká pa Mundial, i ta okupá e di 27 puesto riba ‘ranking’ di FIFA. E wega akí ta programá pa tuma lugá 5:10 di mardugá ora lokal aki na Kòrsou, i ta tuma lugá den Aami Park na e siudat di Melbourne.