WILLEMSTAD.- Federashon di Sòftbòl (CSB), bou direkshon di e hóben dirigente Lernnerth Angela, rápidamente a tene un kampionato (kòrtiku) despues ku a forma un direktiva nobo pa e federashon. Siguiendo di un forma dinámiko ku e trabou ku nan a bin ta hasi den di dos parti di 2016, djasabra último e federashon a tene su anochi di premiashon na World Trade Center.

“Pa mi, esaki ta e direktiva di 2016 den deporte”, asina sekretario di FDOK, Rein Persaud, a duna di konosé durante dje seremonia na WTC. Persaud a pone atenshon riba e echo ku “hóbennan a tuma over den sòftbòl, pero a sa di amplia e direktiva ku hendenan ku tin eksperensia”. Ta bini aserka, segun e representante di FDOK, ku ta bon pa tene kuenta ku tin 4 dama den e direktiva i ku e kombinashon di hóben, sernan femenino i otronan ku eksperensia a duna resultado.

Importante ta ku e direktiva a sòru pa un airu di rèspèt i disiplina, inkluso riba tereno, pero tambe serka e públiko. “Pa mi, esaki ta e direktiva di 2016”, Persaud a asentuá.

Di parti di spònser MCB tabata presente sra. Mariela Romero, kende ademas di a hasi entrega dje diferente premionan, a presentá ku un chèk di Fl. 500,-- pa e ekipo mas disipliná, kual a resultá di ta Dream Team.