WILLEMSTAD.- E Siman di Kultura 2019 ta dediká na krea i ta pone enfoke riba kreatividat di e hende i kon e hende por usa su kreatividat pa generá un entrada sostenibel. Tin un término ku ta usa pa esaki ku ta kai bou di e asina yamá “Orange Economy” òf “Economía Naranja”, den Papiamentu Ekonomia Oraño.
Dikon ta usa e koló oraño ora ta papia di kreatividat? E koló oraño histórikamente ta konektá ku hubentut i felisidat. Mayoria ta konsiderá oraño e kolo ku ta duna mas alegria, hopi biaha asosiá ku kultura i kreatividat. Mas aún e koló oraño ta prosedente di e fruta apelsina ku un hende por primi i saka su djus; pues ku esaki ta ilustrá e proseso di saka lo máksimo for di algu i krea algu otro.
E ekonomia o industria kreativo ta e sektor di e ekonomia ku ta trata e generashon di idea i di konosementu. E ta konsentrá riba partikularmente e industria kultural konsistiendo di arte (entretenimentu, diseño, arkitektura, publisidat, gastronomia) i e ekonomia di konosementu (edukashon, teknologia, informátika, telekomunikashon, etc).
Kòrsou tin gran potensial riba e tereno aki i den e Siman di Kultura ta pone aksènt riba e diferente fasetanan di ekonomia oraño i e potensialnan riba diferente área kultural.
Minister Marilyn Alcalá-Wallé ta deseá hinter pueblo di Kòrsou un felis Siman di Kultura, yená ku positivismo sosteniendo otro, enkurashando i empoderando otro pa sigui konstruí un mihó Kòrsou!