WILLEMSTAD.- Dia 11 Aprel próksimo, pues Bispu Pasku di Resurekshon anochi, Agrupashon musikal ERA tei selebrá nan di 38 aña di eksistensia den mundu farandulero lokal i pa e okashon aki, Mathey Werf na Otrobanda a wòrdu skohé komo esenario pa e Gran Selebrashon aki ku lo bai konta tambe ku animashon di Fernando Villalona ku su Orkesta for di Repúblika Dominikana i tambe GENTZ ku na e momentunan aki ta den super gran forma, despues ku nan kantante estelar Ray Lauffer a ser korona komo Rei di Tumba 2020.

Despues ku e informashon di e “Fiestón” aki a keda publiká siman pasa, a lanta un interes enorme pa ku esaki, pues un indikashon kla ku e Selebrashon 38 aña ERA sigur lo bai dal sumamente duru.

VILLALONA

Fernando Villalona kende ta un di e artistanan Dominikano hopi gusta aki na Kòrsou a enfatisá ku durante e Fiesta aki lo e bai presentá únikamente su éksitonan ku a hasié asina popular rònt mundu manera entre otro “América Latina”, “El Carnaval”, “No Podrás”, “Penélope” i un kantidat di éksitonan mas, pa laga e públiko ku lo bai ta presente disfrutá tur afó di su éksitonan un tras di otro.

GENTZ lo bai prepará pa e okashon aki un repertorio speshal bon varia i ku e enfoke pa buta e ambiente pa laga tur hende gosa i hasta pa no laga niun hende baha for di e pista di baile. Finalmente ERA no mester di niun introdukshon paso “Ambiente” ya ta den nan nòmber kaba i ta músika di e diferente periodonan di ERA lo bo bai tende durante e anochi aki.

BENTA DI KARCHI

Mathey Werf lo bai wòrdu parti den dos sekshon ku lo ta Sekshon General i Sekshon V.I.P. Karchinan pa sekshon general lo ta optenibel na e establesimentunan Mensing’s, Beep Beep, 24 Uur Uit de Muur i na Fun Miles lo tin karchi di sekshon general i VIP konforme e pakete promoshonal di Fun Miles.

Karchi VIP ta respektivamente pa mesa di 10 persona ku ta All In i tambe pa mesa di 4 persona ku ta inkluí 5 bebida di bo smak. Por kumpra karchi di VIP eksklusivamente na Mensing’s òf por yama tambe na e number 511-3433 pa reservashon òf informashon.