WILLEMSTAD.- Fundashon Streanan di Boneiru e aña aki ta bai organisá un biaha mas e festival Ban kanta nos Boneiru, ku partisipashon di tantu adultonan i nos hóbennan.
Pa partisipashon na e festival hubenil, e hóben mester ta entre 8 pa 16 aña i partisipashon na e festival grandi ta di 17 aña bai ariba. Djasabra 12 di ougùstùs 2017 e festival grandi ta tuma lugá i djadumingu 13 di ougùstùs 2017 e festival hubenil. Sitio di e festival lo bira konosí mas despues.
Meta prinsipal di e festival aki ta pa promové tantu kompositornan, areglistanan i kantantenan, alabes duna realse na e.o nos kultura, patriotismo, kustumbernan, norma i balornan.
Pa loke ta trata e orkesta, lo  hasi uso un biaha mas di Orkesta Streanan di Boneiru bou di direkshon di sr. Dwight Leoneta. E konstelashon ta konsistí di músikonan profeshonal i ku ta dominá e siguiente instrumentonan:
1 Piano, 1 Bass, 1 Key Board (strings) (opshonal), 1 Drùms/Timbal, 1 Konga, 1 Bongo/Kampana/Perkushon menor, 2 Trompèt, 2 Trombon, 1 Tenor/Alt Sax
3 Korista (Alto, Tenor i Bass)
E aña aki un bia mas tin e oportunidat pa tantu Bonerianonan biba pafó di Boneiru òf personanan no Boneriano biba pafó di Boneiru, tambe por partisipá na e festival aki, sea komo kompositor di letra òf areglista. Pa loke ta trata e kantante, e por ta un Boneriano biba pafó di Boneiru òf un persona residensiá na Boneiru.
Pa loke ta e premiashon, e aña aki tambe ta bai tin premio pa tur kompositor di letra i tambe tur areglista di tantu e ganadornan komo e finalistanan.
Fundashon ta spera ku e aña aki atrobe lo tin gran kantidat di artistanan tantu adulto komo hubenil ku lo partisipá na e festival aki sea komo kantante, kompositor di letra òf areglista.
Pa mas informashon por yama 560-7070, 796-0007 òf por manda un e- mail na: festival.kantaboneiru@gmail.com