WILLEMSTAD.- Djasabra, 18 di novèmber, lo tin e di 31 edishon di e festival organisá pa Fundashon Koronan Uní.
Tur aña e Fundashon Koronan Uní ta tene su festival di koro den e wikènt di òf esun promé ku selebrashon di Santa Cecilia kual nos ta selebrá su fiesta dia 22 di novèmber.
Te ku medieval Papa Gregorius tabata e patrono santu di músika i músikonan, pero despues ku Akademia di músika Romano a ser fundá na 1584, el a bin kai bou di protekshon di Santa Cecilia. T’asina Santa Cecilia a bira e patrono di músika i músikonan.
Na Kòrsou ta selebrá e echo aki ku e festival di koronan i Asosashon di Músiko tambe ta tene un enkuentro ku su miembronan.
Durante di e siman aki Fundashon Koronan Uni a purba di trese algun informashon general tokante di kantamentu i koro na nos komunidat.
Djasabra awor tin un oportunidat pa mira en persona kon nos hendenan lokal ta apliká e téknika koral usando harmonia i kombinashon di bos. Lo tin en total 10 Koro i kada koro lo presentá 2 kantika di propio eskoho.
Lo tin tambe un hurado ku lo husga e presentashon di e koro riba e siguiente puntonan: (a) fraseo musikal, (b) artikulashon, (c) interpretashon, (d) direkshon koral, (e) dinámika. Lo no ta bai tin un ganador ya ku no ta un festival di kompetensia. Tur kor ta risibí nan evaluashon por eskrito i tambe rekomendashonnan di hurado.
E festival di e aña aki lo tuma lugá djasabra dia 18 di novèmber na misa di Brievengat i lo kuminsá  pa 8’or di anochi.
E aña aki e koronan, Orfeon Allegro, Vocal Pop Corn Singers,    Grupo Serenada, Kor Guadalupana, Kor Margarita, Angelitos, God’s Angels, Milestone, Kor Sta. Rosa de Lima, i Faith lo aktua durante di e konsierto. Entrada ta grátis.
Fundashon Koronan Uní ta invitá un i tur pa bini masalmente bin apresiá trabou duru di nos mes koronan i asina yuda fomentá kanto koral den nos dushi Kòrsou.
Pa mas informashon di e festival i riba aktividatnan di Fundashon Koronan Uni,  por drenta den kontakto ku e presidente Gilbert Grüning na telefòn 510-6808 o manda un e-mail na kornanuni@gmail.com tambe por bishitá e página sosial riba facebook kornan Uni.