WILLEMSTAD.- Djasabra dia 17 di novèmber, lo tin e di 32 edishon di e festival organisá pa Fundashon Koronan Uní (FKU). Tur aña e Fundashon Koronan Uní ta tene su festival di koro den e wikènt di òf esun promé ku selebrashon di Santa Cecilia kual nos ta selebrá su fiesta dia 22 di novèmber .
Un bista bèk den historia ta revelá ku te ku medieval Papa Gregorius tabata e patrono santu di músika i músikonan, pero despues ku Akademia di músika Romano a ser fundá na 1584, el a bin kai bou di protekshon di Santa Cecilia. T’asina Santa Cecilia a bira e patrono di músika i músikonan. Na Kòrsou ta selebrá e echo aki ku e festival di koronan i Asosashon di Músiko tambe ta tene un enkuentro ku su miembronan.
Komo ku gobièrnu a deklará e siman benidero komo e siman di Kanto Koral, FKU durante di e siman ei lo di trese diferente informashon general tokante di kantamentu i koro na pa komunidat. Esaki pa amplia e konosementu den nos komunidat tokante di músika, kantamentu i spesial kanto koral.
E kulminashon lo ta djasabra di 17 di novèmber pa 8 or di anochi na misa di Brievengat. Durante di e anochi ei lo bai tin en total 12 Koro i kada koro lo presentá 2 kantika di propio eskoho. Interesante ta ku lo tin tambe koro di mucha, koro di hóben, i un koro internashonal di Sürnam ku lo partisipá den e festival e aña aki.
E festival no ta di kompetensia pero si lo tin tambe un hurado ku lo husga e presentashon di e koro riba diferente aspekto musikal i koral manera e.o. fraseo musikal, artikulashon, harmonia, presentashon, etc.  Tur kor ta risibí nan evaluashon por eskrito i tambe rekomendashonnan di hurado pa asina mehorá e kanto i prestashon den futuro.
E koronan ku lo partisipá na e festival e aña aki ta: Kor Margarita/Youth Chapter, Kòrsou a la Belcanto, Vocal Group Popcorn, Zangvereniging Harmonie, Kor Orfeon Allegro, Kor Maranata di Surnam, Kor Guadalupana, Kor Rejoyce, Grupo Faith, Kor Trinidad de Voces.  Entrada ta Grátis
Fundashon Koronan Uní ta invitá un i tur pa bini masalmente djasabra dia 17 di novèmber 2018 pa 8’or di anochi bin apresiá trabou duru di nos mes koronan i asina yuda fomentá kanto koral na Kòrsou. Pa mas informashon di e festival i riba aktividatnan di Fundashon Koronan Uni, nan por drenta den kontakto ku e presidente Gilbert Grüning na telefòn 510-6808 o manda un e-mail na kornanuni@gmail.com tambe por bishita e página sosial riba facebook kornan Uni.