WILLEMSTAD.- Amantenan di músika Reggae i Latin por disfrutá na Statia durante e wikènt di 22 di febrüari, den kua lo tin e evento anual “Mega Musical Experience Weekend”. E wikènt aki ta marka kontinuashon di e kampaña insular “Dare2Care” kontra violensia doméstiko. E kampaña ta un inisiativa komun di Entidat Públiko di St. Eustatius i Mega D Youth Foundation. Akto prinsipal lo ta e konsierto di estrea di reggae Ky-mani Marley, yu di e legendario Bob Marley.
“Esaki ta di dos aña ku nos ta organisando e kampaña aki, huntu ku Entidat Públiko di Sint Eustatius”, direktor Dion Humphries (alias Mega D) di Mega D Youth Foundation ta konta. “Lamentablemente violensia doméstiko ta un fenómeno  ku ta keda pidi hopi atenshon.”  Dirkje de Jong, Kordinadó di Maneho kontra Violensia Doméstiko i pa Derechonan di Mucha ta splika: “Ta p’esei semper nos ta buska maneranan kreativo pa trese e tema aki dilanti. Aña pasá nos a logra esei ku e festival di derechonan di mucha, kaminda muchanan mes a traha sine kòrtiku tokante e tópiko aki. E sine ganadó a wòrdu presentá durante e Curaçao International Film Festival Rotterdam.”
E wikènt musikal na Statia ta kuminsá riba e djabièrnè anochi ku e Latin & Caribbean Soul train party riba e board walk. A skohe konsientemente pa un anochi ku músika Latin pa envolví e komunidat “Latino” kresiendo. Atmishon lo ta grátis. Pa sostené e tema di e kampaña, ta pidi tur partisipante pa  bisti full na blanku. Tambe lo tin un kompetensia di baile. Riba zonido di piesanan di Bachata, brindá dor di e dj-nan Eagle i Ricky (República Dominicano), amantenan di Bachata lo por kompetí riba pista di baile. E dos mihó bailadónan lo gana un pasashi pa Santo Domingo. Tres otro dj popular: mr. RunnThings i Deejay Sense (Statia) i Zander Zone (Saba) lo brinda piesanan di Caribbean Soule renombrá. Partisipantenan lo risibí un asento grátis di koló püs pa kompletá nan outfit, püs siendo e koló kontra violensia doméstiko.
E konsierto ku Ky-mani Marley lo tuma lugá e djasabra anochi, riba e tereno di Nustar Community Ground den e bario Golden Rock. Banda di e estrea di reggae tambe lo tin animashon musikal di bandanan regional i lokal, manera Latin Sur Band, T-Time i Turbulanzz Band.
Pa informashon aktual tokante e evento i benta di karchi por subi e página di facebook The Mega Musical Experience-St. Eustatius. Riba wèpsait di St. Eustatius Tourism Office (statia-tourism.com ) por haña informashon tokante akomodashon i restorant riba e isla.