WILLEMSTAD.- Djasabra último, 14 di aprel a tuma lugá final di e festival di sine pa mucha di mas grandi den Karibe. Den teater The Cinema’s  a presentá e pelíkulanan ku muchanan di skol básiko mes a pensa i traha. Durante e seremonia festivo, ku tabata parti di Curaçao International Film Festival Rotterdam, alumnonan di Strea Briante di Boneiru a gana e premio pa e mihó pelíkula.
Na e final di e Festival di Derecho di Mucha di UNICEF tabata presente tambe minister presidente Eugene Rhuggenaath i gobernador Lucille George-Wout. Pues esaki tabata é oportunidat pa e muchanan laga tumadónan di desishon mira kua derecho di mucha nan ta haña importante i kon esaki ta bin dilanti den nan bida.
E último lunanan, alumnonan di skol básiko di Aruba, Boneiru, Kòrsou, Sint Maarten, Sint Eustatius i Saba a traha duru pa produsí un propio sine. Pa esei nan a haña yudansa di un coach di sine profeshonal. E pelíkulanan ku e muchanan a traha, ta bai tokante e derecho di mucha ku nan mes ta haña importante.
Finalmente pa kada isla, e skol ku e mihó pelíkula por a partisipá na e gran final na Kòrsou. E finalistanan tabata di e seis skolnan: Colegio Santa Filomena (Aruba), Strea Briante (Boneiru), Fatima College (Kòrsou), akohida despues di skol Mega D Youth Foundation (St. Eustatius), akohida despues di skol Child Focus (Saba) i Christian Hillside (St. Maarten). A risibí e alumnonan ku hopi gleter i glamur. Manera strea di sine real, huntu ku e públiko grandi, nan a mira nan arte di aktuashon riba pantaya. Te na último momentu a keda ku suspenso ken lo bai ku e premio.
Un aplouso fuerte a zona ora a anunsiá alumnonan di Kolegio Strea Briante komo ganadó. E muchanan di skol básiko Strea Briante kasi no por a kere. Samantha di diesun aña ta konta masha kontentu: “Mi a haña tur sine bunita pa mira. Pero mi tabata asina kontentu ora gobernador di Kòrsou a bisa ku nos skol a gana!”
Su kompañero di klas ta konta emoshoná for di podio “Komo ku nos ta di enseñansa spesial, hende ta pensa hopi biaha ku nos no por masha. Pero awor nos a gana e festival di sine! ”
Ku e Festival di Sine di Derecho di Mucha, na un manera aktivo i kreativo UNICEF ke hasi mucha konsiente di nan derechonan.
Sasja Bökkerink di UNICEF Ulanda: “Ku traha un pelíkula, derecho di mucha realmente ta bai biba. No solamente pa mucha, pero tambe pa nan mayornan i dosentenan ku ta mira nan yunan i alumnonan lusi den un pelíkula.”
E final di Festival di Sine di Derecho di Mucha di UNICEF tabata parti di Curaçao International Film Festival Rotterdam i a bira posibel ku yudansa di Ministerio di Interior i Relashon ku Reino.