WILLEMSTAD.- Festival di Tumba 2018 ta wòrdu dediká na Eduard ‘Dito’ Mendes de Gouveia. Ayera nochi durante dje rueda di prensa di AMAK, Sr. Feco Gomes, presidente di AMAK a hasi e anunsio ofisial na medionan di komunikashon. Sr. Dito Mendes de Gouveia tabata e personal sentral den negoshashon pa AMAK por a yega na Curaçao Festival Center. Festival di Tumba durante di su eksistensia tabata kambia kontinuamente di lugá. Roxy, Cinelandia, SUBT, Industrie terrein na Zeelandia, SDK i SUBT. Ora ku herederonan di Angel Job, dfm, no kier a sigui mas ku e negoshi di ‘Drive In’, Gobièrnu a intermediá p’asina por a pasa e tereno komo erfpacht na nòmber di Curaçao Festival Center. Den e intermediashon aki Sr. Mendes de Gouveia tabatin un ròl sentral. E meta di esaki tabata pa yega na un fasilidat fiho ku su tarima i un infrastruktura total. Tur esakinan a sosodé tempu ku Sr. Mendes de Gouveia tabata Diputado di Kultura di 1998 pa 1992. Despues ku presidente di AMAK a hasi anunsio dje dedikatorio a presentá Sr. Mendes de Gouveia kende den su diskurso a deseá pa e nivel di músika sigui subi i ku nos tur ta dispuesto pa yuda hubentut pa nan tambe drenta e direkshon di ta artista i yuda karga nos ritmo lokal ku ta tumba.