WILLEMSTAD.- Despues di un temporada basta preokupante pa loke ta trata eksistensia di Festival di Tumba, ayera nochi por a nota ku presidente di AMAK, Sr. Manfred ‘Feco’ Gomes tabata sumamente kontentu na inisio di dje rueda di prensa kaminda AMAK a presentá su shete ‘brandingpartners’. Ku presentashon dje partnernan pa Festival di Tumba no solamente a hasi posibel ku festival lo konta ku apoyo di spònsernan ku ta kere den e evento, pero tambe a demostrá un biaha mas ku Festival di Tumba ta e evento kultural mas grandi di Kòrsou. Licores Maduro, KFC, Ofisina di Turismo, P.S.B. Bank, Gobièrnu di Kòrsou huntu ku Refineria Isla i Curoil ta sostené Festival di Tumba 2018. Minister Sra. Marilyn Alcalá-Wallé den su diskurso a pone énfasis ku Karnaval di Kòrsou no ta Karnaval sin su Festival di Tumba, un festival ku a krese durante añanan i bira un seyo kultural ku ta impaktá i promové nos isla mundialmente den diferente área, entre otro kultural, sosial, turístiko i tambe ekonómiko. Mas aleu Sra. Alcalá-Wallé a indiká ku no ta eksistí Karnaval sin su Tumba!. Djadumingu awor tin inskripshon pa Festival di Tumba 2018 i presidente di AMAK, Feco Gomes a indiká ku e aña aki atrobe tin un interes hopi haltu pa partisipá na e festival. Riba e potrètnan ku ta kompaña e artíkulo bo por tuma nota imágennan kapta durante dje rueda di prensa di AMAK.