WILLEMSTAD.- Ayera nochi a tuma lugá e rueda di prensa di Festival di Tumba 2019. Manera ta e tradishon sr. Manfred ‘Feco’ Gomez a tene su diskurso kaminda el a toka diferente tema interesante pa loke ta trata e evento musikal mas importante pa nos artistanan lokal.
Un dje puntonan ku a hala atenshon sigur ta su splikashon dje gastunan ku tin ku Festival di Tumba. Segun Feco: “Festival di Tumba ta un aktividat hopi kostoso pa por mantené un nivel di produkshon musikal haltu. Festival di tumba durante último 2 dékadanan a krese na kalidat di kontenido i produkshon, lokual ta trese kuné, un oumento enorme di gastu pa nivel di organisashon i partisipashon.
Un festival di tumba di e promé 3 dékadanan tabata limitá, na un festival ku bon zonido i iluminashon, bon nivel di tumba, i un bon organisashon.
Desaroyo tékniko riba nivel internashonal, pa lokual ta trata produkshon di konsiertonan grandi, a hasi su entrada na Kòrsou tambe.
Konsekuensia di e desaroyo aki, ta ku mester a hasi mas invershon finansiero, pa logra un produkshon di festival di tumba, na un nivel ku ta kuadra ku e normanan vigente.
A bira nesesario, pa hasi uso di ekiponan mas sofistiká pa un mihó kalidat di zonido i iluminashon, pa garantisá un nivel haltu di transmishon lokal i internashonal.
A bira nesesario, pa oumentá e kuerpo di téknikonan, ku mester prepará, durante un periodo di 2 siman  intensivamente pa por logra yega na e mihó produkshon final.

Balor Ekonómiko i Turístiko
A yega e momento, pa nos hasi un análisis di e balor ekonómiko i turístiko ku Festival di tumba tin pa nos pais.
Ta e intenshon pa AMAK, laga un kuerpo investigativo profeshonal, hasi un estudio riba e impakto  ekonómiko i turístiko, ku festival di tumba tin, pa di e forma ei, laga tur instansia konserní duna mas sosten na e evento aki.
Pa nos adelantá e resultado di e enkuesta ofisial, AMAK a hasi uso di su eksperensia i informashonnan ku e ta disponé di dje.
Festival di tumba ta un magno evento kultural musikal grandi, ku  ta generá entrada i gastunan direkto, pero ku ta sirbi komo un katalisadó tambe pa hopi aktividatnan ekonómiko i turístiko adishonal. Si pa un o otro motibu Festival di Tumba no por kontinuá, esaki lo tin konsekuensianan negativo hopi grandi pa karnaval, turismo i nos ekonomia.
Ta pa e motibu ei, partisipashon di partnernan den e festival, ta bira kasi un obligashon pa sostené i mantené e pilar ekonómiko i turístiko aki na bida.
Festival di tumba tin un struktura, ku ta funshoná manera un koperativa, pues e saldo ku ta keda, despues di paga tur gastu, ta keda repartí entre e partisipantenan aktivo i e organisashon. Si e saldo  bira ménos e saldo pa repartí tambe ta bira ménos.
Pa lokual ta trata e parti di entrada i gastunan direkto, por menshoná ku Festival di Tumba tin un presupuesto di 1.7 mion, di kua sigur un 35 pa 40 %, ta konsistí di aportenan di produkto”, asina Feco a terminá bisando.