WILLEMSTAD.- Mañan, djabièrnè 28 sèptèmber 2018, studiantenan di Eligia Martier SBO ta bai kanta kansionnan kultural kompañá pa grupo rítmiko ‘Hóben Na Timon’. Esaki ta den kuadro di siman di kultura, motivando e hóbennan ku ta e futuro profeshonalnan den kuido i bienestar di nos pais, pa ta kargadónan di nos kultura.
Den e festival aki ta bai tin 7 hóben ku lo kompetí. Nan lo kanta géneronan manera; wals, seú, tumba, tambú i dansa.
E festival lo tuma lugá den kurá di skol di Eligia Martier SBO na Steenrijk, Oosterbeekstraat 5, kuminsando di 8 or te ku 12 or di anochi. Pa e anochi aki lo tin show time di grupo rítmiko Orirí i tambe grupo di tambú Brasa Brasa.
Fondonan akumulá den e aktividat aki ta bai repartí pa e hóbennan ku mester hasi biahe di estudio otro aña den luna di mart, komishon parada di tiner di skol i primordial pa e pòt ‘Eligia ta yuda’ (ku ta e pòt pa yuda hóbennan ku nan situashon na kas no ta masha stabil)
Un invitashon ta bai na pueblo di Kòrsou kompletu pa yega na bòshi i koperá ku e hóbennan aki. Entrada ta solamente 5 florin. Por parker na Maris Stella SBO i drenta bùs yega fásil dilanti Eligia Martier SBO.  Ban yuda i sosten e hubentut ku ta riba e bon kaminda.