WILLEMSTAD. – E aña aki ta kumpli eksaktamente 10 aña ku a inisiá ku e proyekto kultural musikal ‘Un Kanto pa Kòrsou’ den kua kompositornan pa medio di nan obra musikal por ekspresá grandesa di Kòrsou den tur forma. E aña aki e festival ta bai pa su di 11 edishon.
Ayera tardi Instituto pa Formashon Musikal i Ministerio di Enseñansa, Siensia, Kultura i Deporte a tene un enkuentro ku prensa kaminda a duna tur detaye pa loke ta trata e festival UKPK.
Sr. Feco Gomes, presidente di IpFM den su presentashon a trese pa dilanti ku e aña aki lo pone énfasis i motivá kompositornan pa duna mas realse na nos ritmonan outéntiko di nos pais. ‘Nos mester sinti nos mes orguyoso ku nos por bende nos pais, hasiendo uso di nos propio músika’.
E festival e aña aki e kompositornan mester hasi mas uso di nos ritmonan outéntiko di nos pais, manera entre otro Wals, Mazurka, Polka, Dansa, Tambú, Seú i Tumba. ‘Nos no kier ekskluí niun ritmo, pero nos kier duna mas atenshon na nos ritmonan krioyo’, asina Sr. Gomes a enfatisá.
Minister, Sra. Alcalá-Wallé a indiká ku festival ‘Un Kanto pa Kòrsou’ ta parti di fomentashon di un kultura di union den diversidat. ‘Den e kuadro aki Gobièrnu di Kòrsou ta hasi tur esfuerso pa sigui fortifiká e balor di su propio hendenan pa hasi kada siudadano konsiente di su puntonan fuerte i pa asina realisá e nashon ku nos ke. Gobièrnu ta sigui promové inisiativanan i ta duna debido atenshon na tur e fasetanan i na e konservashon i promoshon di kultura pa mantené e konsenshi históriko di Kòrsou. Den un palabra: ‘Un historia den moveshon’.

INSKRIPSHON
Entrante awe, 4 di mei 2018 inskripshon pa UKpK ta habri i ta klousura otro siman djabièrnè,  11 di mei 2018 pa 5’or di atardi. Riba djasabra 12 di mei e komishon lo reuní i tuma e desishon final ken lo por partisipá na e festival. Djaluna, 14 di mei lo anunsiá e partisipantenan.
Festival ‘Un Kanto pa Kòrsou’ ta tuma lugá dia 3 di yüni 2018 na Lanthuis Brakkeput Mei Mei. E festival ta kuminsá pa 8’or di anochi i ta plania pa terminá pa 11’or di anochi. Karchi delantá ta kosta 25 florin i na porta 35 florin. Karchi ta optenibel na 24 uur uit de muur, Samson i na Festival Center.