WILLEMSTAD.- E komishon organisadó di festival un kanto pa Kòrsou 2018, Instituto pa Formashon Musikal i sektor kultural di Ministerio di enseñansa, siensia, kultura i deporte, ta sumamente satisfecho ku e resultado di e festival.
Ounke e organisashon a konfrontá na prinsipio problema, pa e falta di sufisiente profeshonal den sekshon di brass, durante e  último  dianan ensayonan a kana hopi bon, despues ku e sekshon di brass a bira kompleto.
Aki ta bai palabra di gradesimentu na funshonarionan di Imigrashon i Toelatingsorganisatie, ku a kontribuí, pa por kaba regla dokumentonan.
Un danki spesial na Sherrel Semeleer pa su aporte balioso na e festival.
E festival aki ta di sumo importansia pa nos pais, i ta p’esei ta importante, ku e kansionnan aki, ku mensahenan profundo por keda zona na radioemisoranan i plantanan di Televishon.
E komishon kier manda palabranan di felisitashon na tur partisipante, pero muy en espesial, na Lady Su pa su bunita interpretashon di e komposishon di Darwin Gregg, “Kòrsou mi Dushi”. Gregory Colina a traha un tremendo areglo i nos orkesta den un forma profeshonal a kompañá tur e kantantenan.
Pabien tambe na Eldridson Eugenia pa su dos komposishonnan, interpretá pa Yentje i Naomie Silvanie, ku a finalisá na di dos i tres lugá.
Un gradisimentu na prensa en general i  gradisimentu na TeleCuraçao, TV Direct, radio Mas i TCFM ku a transmití e festival pa tur esnan ku a gosa pa medio di e transmishonnan.
Finalmente e komishon kier gradisí esnan ku a sostené e festival, ku ta Gobièrnu di Kòrsou, Amak, Licores  Maduro, Multipost, Coca Cola i Cursoft.