WILLEMSTAD.- Instituto pa Formashon Musikal for di inisio dje proyekto ‘Un Kanto pa Kòrsou’ anualmente ta skohe un baluarte na kua nan ta dediká e festival na dje. E aña aki e honor a toka na e popular kantante femenino, Melania van der Veen. Melania tin un karera artístiko impreshonante ku un sin fin di ‘highlight’ durante di su karera ku a kuminsá na momentu ku e tabatin 14 di edat i a bai partisipá den un festival di músika mehikano. Melania a gana diferente festival entre nan: Festival Bos Eskolar, Festival Bos di Oro den tres promé finalistanan, Festival di OTI di Kòrsou, Festival di OTI Antia i Caribbean Broadcasting Union Festival na Trinidad. Na 2005 i 2006 Melania a gana premio Edgar Supriano komo kantante femenino di aña. Eksitonan grandi ku Melania a pega durante su trayektoria ta entre otro ‘Te na fin di Mundu’, ‘Tene mi bibu den Amor’ i ‘Kos bon tei bira Mihó’. Melania a produsí tres albùm i ta kantando ketu bai komo solista i tambe ku su kor den diferente parokia Katóliko di Kòrsou. Un pabien na Melania van der Veen ku su eskoho komo baluarte pa ‘Un Kanto pa Kòrsou’.