WILLEMSTAD.- Kòrsou i Cuba ta dos pais ku ta hopi serka di otro i esaki semper a keda demostrá den e músika Cubano.
Sea ta bolero, salsa, montuno, guaracha semper ora ku e piesanan aki zona tur yu di Kòrsou ta kuminsá move. Asta den bistimentu tambe nos por mira kon e yu di Kòrsou semper ta gusta bisti e estilo Cubano.
Ta tur siman aki na Kòrsou tin fiesta ku ta imitá e estilo Cubano i djadumingu awor ta bai tin un fiesta estilo Cubano den Hòfi Wayaca den kura di Habaai.
Ya ta hopi tempu kaba ku hopi hende ta bisa ku nan tin e deseo un dia di por bai un fiesta ku ta toka solamente piesa di Sonora Matancera.
I e djadumingu aki Kòrsou kompletu huntu ku abitantenan di Bírgen di Rosario i tambe e zùster i brudernan ta huntu den Hòfi Wayaca.
Loke ta hopi hopi importante ta ku e fiesta aki estilo pik nik ta manera ántes. E piknik aki ta kuminsá nèt nèt 1’or di mèrdia i e ta kaba 7’or anochi. Esaki ta algu ku masha dia bo no ta mira aki na Kòrsou. Sali bo kas trempan i yega kas trempan.
Laga nos tur ta huntu e djadumingu aki huntu ku Bírgen di Rosario balia i gosa ku tur e piesanan di e gran Sonora Matancera.
E dj ku ta responsabel pa toka tur e piesanan aki ta dj Rie un dj hopi dediká na su trabou.
Woty di Mangusa, Finchi Statia lo ta esun enkargá pa animá e fiesta aki.
Nos ta mira otro djadumingu awor den Hòfi Wayaca na Habaai di 1’or di mèrdia pa 7’or di anochi pa nos gosa di Sonora Matancera.