WILLEMSTAD.- Djadumingu último 21 di mei mucha/hóbennan di Buena Vista a duna un bunita presentashon na kolegio Nechi Pieters.
For 15 di mei e tim di Teatro Luna Blou tabata na kolegio Nechi Pieters ku e proyekto “Teater den Bario” pa asina duna diferente tayer na mucha/hóbennan di ‘Child First Foundation’.
Muchanan a haña tayer nan manera baile duna pa Jessy Wall, aktuashon pa Abigahie Pinedo i kanto serka Shanuska Schoop.
E tim a traha sinku dia intensivo riba un bunita show kaminda e muchanan a demostrá nan talento. Un total di 26 mucha/hóben den e edat di 4 pa 12 aña a forma parti di e proyekto aki ku Teatro Luna Blou a organisá.
Un atardi agradabel kaminda mayornan por a disfrutá di e show ku tabatin komo tema “ Fiesta den Mondi”. E historia ta bai tokante shon tiger su yunan a hasi aña i e la invitá tur bestia den mondi pa bin selebrá. Asina e historia a kana den otro i tabatin baile i kanto den dje.
Teatro Luna Blou kier yama un danki na ‘Child First Foundation’, na tur e mayor nan pa a duna nos e oportunidat i e konfiansa pa traha ku e mucha/hóbennan di bario di Buena Vista.
Un danki tambe na kolegio Nechi Pieters ku a koperá ku nan lokalidat pa asina  proyekto “Teater den Bario” por a tuma lugá.