WILLEMSTAD.- Kada aña di nobo Curaçao International Film Festival Rotterdam (CIFFR) ta demostrá ku Kòrsou tin un pashon pa “art house films” i pelíkula di festival. Míles di hende ta akudí na e festival pa mira pelíkulanan internashonal ku ta bria pa nan tema, originalidat, i tremendo trabou di kámara i otro aspektonan. Pero lamentablemente durante sobrá di aña amantenan di e pelíkulanan aki no ta haña nada mas.
Ta p’esei Justus Martens, Michael Elias i Percy Pinedo, tur tres ku ta afiliá na CIFFR a kuminsá 2 aña pasá ku preparashonnan pa un organisashon lokal, Curaçao Film Liga; por sierto ku e film liga aki no ta afiliá na CIFFR i no tin nada di aber ku CIFFR. A dura algun tempu, promé ku a yega na un database di amantenan di sine, pero finalmente último lunanan aproksimadamente 600 hende a bira miembro. Miembronan ta paga Ang. 100 pa aña, i asina tur luna nan por wak pelíkula; tin biaha na The Movies i otro biaha na un sitio apropiá i interesante. Mayoria pelíkula ta arthouse films òf pelíkula di festival, pero por ta tambe un pelíkula klásiko, dokumental, musikal òf pelíkula ku un tema speshal. Tempu tempu lo organisá aktividatnan rondó di e pelíkula, manera workshop, lektura, etc. i de bes en kuando lo por ofresé un bon biña i un snèk.
Entre tanto a funda Curaçao Film Liga i a skohe e promé bestür, bou di presidensia di Sra. Rose Boeve, Saul Castano Ortiz komo sekretario, Sra. Behna Hasanzadah komo tesorero i Sra. Elaine Con, Sra. Dorine van Elzen, Sra. Eva den Heijer, i Srs. Justus Martens i Percy Pinedo komo miembro.
Ta ku sumo plaser e bestür ta anunsiá ku lo presentá e promé pelíkula dia 26 di òktober, pa 19.15’or, komo apertura na The Movies. E promé pelíkula ku lo pasa ta e pelíkula Chileno “Una mujer Fantástica” di e regisor Sebastián Lelio. Promé ku presentashon di e pelíkula, lo tin un “bitter” organisá pa Curaçao Film Liga, pa introdusí nos liga di un manera festivo.
E anochi aki ta solamente pa miembro di Curaçao Film Liga. Pero esnan ku no ta miembro ainda, por bin tambe, pero mester bira miembro, via di info@curacaofilmliga.com òf na entrada di The Movies riba e anochi mes. Kòrsou den pasado ta tin su liganan i Curaçao Film Liga ke sigui ku e tradishon aki i ta spera di por enrikesé e kultura di amantenan di sine riba nos isla.