WILLEMSTAD.- Un karakterístika hopi importante di kualke kantante òf músiko ta su formashon sosial. E tim di maneho di Dreams a motivá su integrantenan pa forma parti di e akshon boluntario den fin di siman tras di lomba, Cura Doet, partisipando na un proyekto masha interesante di Curaçao Zoo.
Tambe, e agrupashon musikal a tene un ‘ban topa’ pa su integrantenan na unda a kombersá di e próksimo plannan i a fortifiká lasonan kolegial miéntras a hunga dominó i sisti e stoma ku un dushi plato di grill.
E agrupashon musikal ku den añanan 2010 pa 2013 a pèrkurá pa un buèlta masha interesante den  farándula di Kòrsou, for di 2017 ku pasonan chikitu pero firme a bin ta implementá tur e ingredientenan ku un tempu a hasi nan un di e mihó bandanan di nos isla pegando diferente hit simultáneamente. Nos tur ta kòrda e hazañanan di Dreams den Club Bananas riba djárason, Dreams Beach Tour, hit tras di hit zonando na radio ku algun front sumamente kayente den añanan 2010 pa 2015.
Axel Pikero a komentá di ta masha kontentu ku su tim aktual. “Komo banda nos a pasa dor di asina tantu kos, ku nan a hasi nos mas fuerte, mas fleksibel i definitivamente mas resistente”. Fanátikonan mester ta pendiente, e siman aki Dreams lo saka un piesa nobo titulá ‘Yin Yan’.