Final Beisbòl AA: Tur kos ta keda disidí djaweps!

Deporte

WILLEMSTAD.- Sta. Rosa Indians no ta habri siman komo kampion di Kòrsou, no opstante e echo ku nan tabata falta un viktoria mas so pa por a selebrá. Wild Cats a pensa otro i a bin bèk di un desbentaha di 0-3 i ku tres viktoria sigui ta forsa wega number shete di e playoff final di beisbòl lokal. E partido lo tumá lugá djaweps 15 di òktober na Tio Daou Ballpark.
Wild Cats djasabra anochi a gana 6-5 i ayera a propiná e indjannan un palisa, ku viktoria di 12 pa 6 pa empatá e seri final. Pues tur kos a bai bek na punto sero i djaweps benidero lo hunga esun wega ku ta disidí e título.

Djasabra anochi den un Parke Tio Daou ku mas públiko ku a spera –tabatin prohibishon pa fanátikonan- Wild Cats a laga Sta. Rosa den tereno riba un base por bola ku basenan yen den bòm di nobeno inning. Tabata un wega bastante pèrta i ku despues di sinku entrada tabatin e skor di 5-4 na fabor di Wild Cats. Pero Sta. Rosa ta bin empatá den kabes di oktavo inning. Den bòm di nuebe finalmente e resultado tòg ta na kai fabor di Wild Cats na momento ku e revista Hershelon Juliana duna base por bola ku basenan yen. E kareda di viktoria ta kana drenta i ta forsa pa hunga e wega di djasabra, ku tabata un oportunidat mas pa Sta. Rosa kaba kos. Pa Wild Cats 6 kareda riba 12 hit i 4 eror. Kennimar Leocadia a tira tremendo relevo di 4.1 inning di 1H, 1 kareda, 2 SO i 2BB. Shurendell Mujica a bati di 4-3, ku 3 RBI i un homerun. Pa Sta. Rosa Indians 5-7-0. Jordan Lucas a tira ocho inning i a karga ku e derota permitiendo 12H, 2 base por bola i a poncha 3. Rochendrick Alexander i Shakir Albert a liga di 4-2 kada un.

Mas viktoria pa Wild Cats
Djadumingu atardi e dos ekiponan un biaha mas tabata dilanti di otro. Wild Cats den tres turno na bate a pone e skor na 9-0 kontra di tres picher. Seis kareda den di dos entrada a pisa, ku tres di nan riba homerun di Dayton Biegel riba lansamentu di relevista Rowendy Windster. Den di tres Rojean Cleofa ta konektá doblete pa manda tres kareda kas.
Risandro Pastros, miéntras tantu, a kuminsá duna señal di kansansio riba montíkulo. Sta. Rosa tantu den di seis komo di shete inning ta yena basenan, pero na ámbos okashon inning ta sera ku dòbel matansa. Un di tres doubleplay ta presentá den di nuebe inning, yudando Wild Cats pa kaba e wega.
Pa Wild Cats 12 kareda riba 12 hit i 3 eror. Kuater bateadó a liga di 4-2 kada un, entre kua Dayton Biegel ku homerun i ku tres empuhá, meskos ku Rojean Cleofa ku tambe a manda tres koredó kas. Risadro Pastros a gana ku 5 inning di labor, durante kua el a tuma 5H, parti 6 ponche i aseptá 2 kareda.
Serka Sta. Rosa Indians 5-13-2. Marc Hennep tabata e promé di seis picher i el a tira 1.1 entrada di 3H, 3 kareda, 1 Base por bola. Jurgen Statie a bati di 4-4.