WILLEMSTAD.- Ayera tardi ‘DEN E BEMBE’ a tuma nota di un komentario ku Rubertico “Benoni” Balentien a pone riba retnan sosial kaminda e ta hasi menshon di un malkontentu ku ta eksistí entre e finalistanan di Festival di Tumba 2017, esaki relashoná ku e kalidat di e CD di Festival di Tumba ku ta riba merkado.

E komentario ta bisa lo siguiente: “Finalista nan di Festival di Tumba 2017 a manda un karta pa AMAK mustrando nan mal kontentu ku e CD ku ta sirkulando riba merkado di Festival di Tumba 2017.

Dia di entrega di premio tur finalista a risibí nan CD komo muestra di apresio pa nan gran trabou, pero grandi tabata nan sorpresa ku ora a skucha bèk e grabashon ta trata aki di grabashon di e promé anochi di nan presentashon pre-eliminar i di mal kalidat di zonido/mixing. Mas ainda a tuma nota ku e sekuensia riba e CD di finalista tampoko ta kuadra segun sekuensia di premiashon.

E finalista nan a tuma kontakto ku otro i unánimemente a skohe pa hala atenshon di AMAK riba esaki i eksigí pa rektifiká i korigí esaki di inmediato. Den un karta fechá djabièrnè 10 febrüari 2017 nan ekspresá esaki i a entregá esaki na AMAK djamars mainta en espera di un kontesta positivo i pa korigí e produkshon final di e CD.

AMAK pa media di sr. Gonzales a tuma nota di e karta i a indiká ku ya ta trahando riba esaki pa por kumpli ku loke e produkshon final aki mester kumpli kuné”.