WILLEMSTAD.- Pharon A. Pilgrim, mihó konosí komo FireOn, ta un artista ku aktualmente ta studiando na Merka. 9 di novèmber 2018 último el a bolbe saka un produkshon nobo titulá “Ami Sa” produsí pa Sean Cannister. E idea tras di e Music Video a wòrdu kreá dor di Stefan Lacroes ku tin e produkshon visual, Sirius Film. E Videoclip ta riba Youtube i tambe por skucha e track aki riba Spotify i na bo radio preferí. FireOn manera semper ke purba inspirá esun ku ta skucha su kansionnan positivamente. E produkshon “Ami Sa” meskos ku tur su kansionnan anterior tin un mensahe tras di dje. E mensahe tras di e kansion aki ta pa rekordá tur hende ku ni maske ki situashon presentá, semper keda para firme pa bo moralnan di bida. FireOn lo ta na Kòrsou desèmber i yanüari. Por sigui FireOn riba media sosial bou di e nòmber Fireonofficialcw.