WILLEMSTAD.- FireOn ta un ‘upcoming artist’ ku a debutá ku su promé ‘single’ titulá “Mama”. Ta trata di e artista Pharon Pilgrim, konosí komo FireON.
Den e entrevista anterior el a primintí ku lo e saka su di dos kansion den luna di yüni kual ta titulá “Imperfekto”.
Meta di e produkshon ta pa alertá un i tur ku bida por ta dushi awe pero ku por tin retonan siguiente dia. Un kos ta sigur, si un hende no tin influensia positivo den bo bida, bo mester sali for di e sirkulo kaminda e hende aki tin influensia.

Inspirashon
FireOn a usa situashonnan di bida ku el a pasa aden pa e skibi “Imperfekto”. Esaki ta e malchi básiko ku FireOn ta operá komo kompositor tin un base, esta krea kansionnan kual hende por identifiká nan mes kuné. Momentu ku esaki tabata kla el a manda e idea i melodia pa e produktor Najee Rosario.  Esaki ta kontinuá ku e mesun malchi esta kreá for di e letranan i melodia, un produkshon final.
FireOn ta un artista ku ke inspirá su públiko pa biba bon. Bida tin hopi buèlta kual nos kada un ta saka otro siñansa for di dje pero e produkshonnan di FireON mester ta un estímulo i e “push” nesesario pa e hende komprondé bida i usa e eksperensia pa hasi bon pa bo mes i mas ku klaro pa otronan.
FireOn ta indiká pa bo keda pendiente pa e kansion ku lo sali na radionan e siman aki i pa fin di luna di yüni e lo lansa e produkshon komo videoclip.