KRALENDIJK- Investigashon kontra fiskal mester determiná si mr. Blanco a manda outo riba hende òf no.

E rumornan rònt di e investigashon di e fiskal riba nos isla ta persistente. Hustamente e echo ku e suseso aki ya tin dos siman ku a tuma lugá pero Ministerio Públiko no a sak’e den publisidat.

Fo’i un fuente digno di krédito nos a komprondé ku tabatin un terser persona involukrá den e suseso aki. E hòmber di inisialnan G.G.

Ta splika nos ku tabatin un diskushon entre e doño di establesimentu i G.G. tokante montante di e kuenta ku e mester paga. Na dado momentu kasa di fiskal a drenta den e kombersashon i a surgi un interkambio di palabra basta fuerte.

Fiskal a manda outo?

Aparentemente e doño a trankilisá e situashon i e kasa di fiskal a bandoná e sitio. Konsekuentemente ora e establesimentu a sera, e hòmber aki a bolbe na e sitio. “E hòmber a bin ku pida palu i tabata menasá den idioma franses.” Esaki nos fuente a agregá.

E diskushon a sigui i mirando ku ámbos partido tabata opviamente bou di influensia di alkohòl no a tarda pa e situashon eskalá. A inisiá bringamentu i tiramentu di piedra.

Fiskal Blanco a presentá na e sitio i segun nos fuente, el a manda outo riba e terser persona. Aparentemente el a dal e persona ku su vehíkulo. E impakto di esaki a benta e persona abou.

 Rumornan

Segun rumornan persistente reshèrshi di Reino ta investigando e kaso i e fiskal a duna un deklarashon den kua e ta atmití di a manda outo pero ku e no sa si el a dal e persona.

EXTRA a papia ku e persona aki ku ta lamentá kon e suseso a kana.  “Loke mi ta haña hopi tristu ta e echo ku fiskal su yu muhé di menor di edat tabata presente. Emoshonal e tabata grita i pidi su mayornan pa bandoná e sitio”, e ta bisa.