ECUADOR, AFP.- Fiskalia di Ecuador ta investigá negoshinan di e empresario kolombiano Alex Saab hòmber di konfiansa di Nicolas Maduro i ku lo ta envolví tambe e èks mandatario ekuatoriano Rafael Correa, asina e parlamentario Fernando Villavicencio a bisa.

Villavicencio un periodista opositor di Correa i kende su gobièrnu a konsiderá un persiguidó polítiko, a suministrá kopia di e notifikashon di fiskalia dirigí na Asamblea Nashonal. Den e dokumento ta señalá e inisio di e investigashon pa presunto delito di spekulashon, habriendo asina e trámite na un rekomendashon di e komishon legislativo di fiskalisashon, ku e mesun diputado ta enkabesá.

Segun e komishon ei, Saab a probechá di e sistema úniko di kompensashon regional (Suvre), un moneda virtual adoptá na 2099 pa paisnan di aliansa bolivariano pa e pueblonan di nos Amérika ALBA i asina supstituí e dòler.

ALBA aktualmente ta integrá pa Cuba, Venezuela i Nicaragua. Ecuador a bandoná e bloke na 2018 i Bolivia un aña despues.

Ku su empresa kolombiano Fondo Global de Construcciones, ku filial na Ecuador, Saab a negoshá e eksportashon di kasnan prefabriká pa Venezuela pa 350 mion di dòler, un operashon similar ku el a realisá ántes for di Colombia, tur durante di e gobièrnu di èks presidente Hugo Chavez ku a fayesé, segun Villavicencio. Caracas a paga ku bolívar i e filial di Saab na Ecuador a risibí dòler atraves di Banko sentral ekuatoriano pa medio di e sistema Sucre.