KRALENDIJK – Ta tumando nota ku un kantidat grandi di flamingo a muri últimamente. Na diferente sitio ta topa ku flamingo morto. Ta trata aki di un fenómeno straño i no ta
konosí kiko ta e motibu di morto di e flamingonan.
Den pasado tambe flamingonan tabata muri despues ku nan dal den waya di koriente prinsipalmente riba Kaya Ir. Statius Van Eps. Despues ku a pega un sistema ku ta bria na e
wayanan, e kantidat di flamingo ku ta dal den waya di koriente a bin baha.
Loke tambe ta remarkabel último tempu ta e kantidat di yu di flamingo desampará. Patras di Mangrove Center na Kaminda di Lac, a bini ku un sorto di santuario kaminda ta kuida e yunan di flamingo pa asina despues ku nan bira adulto i nan por sòru pa nan mes, ta bai bèk den nan ambiente.
For di informenan periodístiko for di Venezuela por komprondé ku debí na e situashon malu na e pias besiña, habitantenan di e pais awor te asta ta mata flamingo pa nan kome.
Esaki kisas por tin di haber tambe ku e kantidat di yu di flamingo sin mama a bin ta oumentá.
Ta konosí ku flamingonan den oranan di atardi ta bula bai Venezuela lagando nan yu atras pa regresá den oranan di mainta. Komo ku ta mata e flamingonan na Venezuela, nan yu ta keda desampará i sin kuido p’esei mes tambe por vinkulá e kantidat grandi di yu di
flamingo ku ta hañando kuido no e santuario na Kaminda di Lac.
Biniendo bèk riba e fenómeno nobo kaminda ta bin topa ku flamingonan morto, no ta trata di yu, pero flamingonan adulto ku di un forma straño ta muri.
Extra a trata na haña sa mas di e motibu di morto di e flamingonan aki i si tin investigashon ta andando pa saka afó e motibu real ku ta kousa morto di e flamingo,
pero no a haña reakshon di STINAPA.
Foto: Live 99.9FM.