Seri pelíkula “Faith, Hope & Determination”

WILLEMSTAD.- Ku bista riba partisipashon di atletanan yu di Kòrsou na Weganan Olímpiko di Tokyo, a produsí un seri di pelíkula bou dje título “Faith, Hope & Determination” ku un focus riba e trayektoria ku e atletanan ta kanando. E persona tras dje proyekto aki ta Thakaidzwa Doran.

Thakai Doran, un persona konosí den nos komunidat, spesialmente den e mundu di deporte, ta pone nos atletanan den spòtlait ku sosten di diferente patrosinador. Esaki lo tuma lugá pa medio di un seri di pelíkula "Faith, Hope & Determination" enfokando riba e trayektoria ku nos atletanan mester a kana pa por yega Weganan Olímpiko ku ta tuma lugá na Tokyo Hapon.

Weganan Olímpiko ta tuma  di 23 di yüli pa 8 di ougùstùs 2021. E evento deportivo mas grandi na mundu mester a tuma lugá na 2020, pero pa motibu di e pandemia a ser posponé pa aña 2021. Mas ku 200 pais lo tin nan atletanan na Tokyo, entre nan Hulanda i Aruba ku lo konta ku deportistanan di Kòrsou ku ta kompetí pa e respektivo paisnan

Thakai Doran, un persona konosí den nos komunidat, spesialmente den e mundu di deporte, ta pone nos atletanan den spòtlait ku sosten di diferente patrosinador. Doran ta trese dilanti ku spesialmente den e tempunan di desafio ku nos ta bibando aktualmente, ta importante pa por inspirá nos hendenan ku storianan positivo i eksitoso. Anteriormente nos por a biba momentunan inolvidabel den Weganan Olímpiko. Na 2008 e momentu ku Churandy Martina a ser deskualifiká pa motibu ku el a trapa riba e liña, pa semper lo keda grabá den nos memoria.

Nèt despues di Weganan Olímpiko na Rio den 2016 Thakai Doran a sera konosí ku e tim di atleta di Kòrsou ku a kore bou di bandera hulandes. El a interkambiá ideanan inspirativo ku Lie-marvin Bonevacia, Churandy Martina, Terrence Agard, Hensley Paulina, Taymir Burnet, Chris Garia, Philip Elhage i mas.

Churandy definitivamente ta un di e grandinan den mundu di korementu. E aña aki e ta partisipá pa di 5 biaha den Weganan Olímpiko. Aparte ku el a habri porta pa nos otro atletanan, el a kore tres biaha den final ku Usain Bolt kende ta un leyenda den e mundu di atletismo. Tokyo 2021 ta Churandy su último partisipashon den Weganan Olímpiko, pues ta un bunita momentu pa por dun’é e elogio ku e meresé.

...Lie-marvin Bonevacia i Churandy Martina durante e filmashon...

Otro atleta ku tin un gran historia di determinashon ta Terrence Agard. Na 2015 el a haña un aksidente den kual el a frakturá su garganta. Kuater aña despues, na 2019, el a bira kampion hulandes i na 2021a klasifiká pa e weganan di Tokyo.

Pa loke ta trata korementu 4x100 meter, por konta ku partisipashon di e atletanan lokal Churandy Martina, Taymir Burnet, Chris Garcia i Hensley Paulina. Den e kategoria di 400 meter, ta konta ku partisipashon di Lie-marvin Bonevacia i Terrence Agard. Tur lo kore bou di bandera hulandes i tin gran ekspektativa pa nan partisipashon.

Disiplina, determinashon i trabou duru ta e ingredientenan mas prinsipal pa por yega na e meta ku ta partisipá na e evento deportivo mas grandi na mundu. Pa e motibu aki, Thakai Doran a bin na e idea pa krea un kampaña positivo pa laga Kòrsou sera konosí ku e atletanan aki i tambe laga nan historia di superashon i determinashon ta un ehèmpel pa kada un di nos. Thakai su meta ta pa konektá nos komunidat ku deporte.

Por sigui e desaroyo di e proyekto aki pa medio di Thakai su plataforma riba medionan sosial manera Facebook i Linkedin @thakaidzwa i tambe su wèpsait http://www.thakaidzwa.com/

Pa loke ta trata e pelíkulanan, pronto e fecha i e lugá kaminda esakinan lo ser transmití, lo keda anunsiá.