BOGOTA, AP.- Kansier Maria Angela Holguin a informá ku fondonan ofresé pa e komunidat internashonal pa postkonflikto di e pais a keda temporalmente kongelá despues ku kolombianonan a vota kontra e akuerdo di pas den referèndem djadumingu.
“E komunidat internashonal a keda babuká pa resultado di e referèndem”, segun indikashon di e kansier den un rueda di prensa.
“Di bèrdat mi mester rekonosé ku tur yamada ku mi a risibí ta di desepshon i ku no por komprondé kon un pais ta tuma e opshon pa no forma pas”.
Algun di e yamadanan aki a ekspresá deseonan pa forsanan polítiko di e pais tin sufisiente madures pa mira kon mester bolbe kue e kaminda pa fin di e konflikto.
Holguin a wòrdu konsultá tokante fondonan di yudansa pa post-konflikto anunsiá pa e komunidat internashonal, spesialmente di Union Europeo i Canada, ku lo ta di 500 mion dòler.
” Tur kosta di vris. Mester warda wak kiko ta bai pasa den e próksimo dianan na Colombia”, segun indikashon di e kansier.
El a manifestá ku el a wòrdu sorprendé ku loke a pasa djadumingu.
“Nos no tabatin un plan B”, asina el a señalá, i a agregá ku ta sperando un reunion mas pronto ku ta posibel ku impulsornan di voto “no”. Na lugá di gana pa e márgen di dos kontra un ku a wòrdu anunsiá den enkuestanan, partidarionan di e akuerdo ku FARC pèrdè pa un márgen di 49,8% kontra 50,2% ku a vota kontra.

ARTIKULONAN RELASHONAMORE FROM AUTHOR