WILLEMSTAD.- Un esfuerso konhunto di AMAK, Instituto pa formashon Musikal i gerensia di Sambil a duna fruta i ta bon pa menshoná ku entrante Ougùstùs próksimo, lo inisiá ku e proyekto di formashon musikal, kaminda hóbennan di e bario di Veeris i besindario, lo haña  oportunidat, pa siña toka  un instrumènt di bientu, (blaasinstrument) manera, tròmpèt, saksofon, trombon i flouta o un instrumènt di kuèrdè manera e.o.
Fió, Bass, Kitara, Piano, Strings.
Pa e proyekto aki, gerensia di Sambil lo pone un lokalidat disponibel i un espasio, pa warda instrumènt.
Lo hasi uso di e dosentenan di IpFM i na momento ku e studiantenan  avansá riba e instrumento di  Fió, un profeshonal di e orkesta sinfóniko di Venezuela, lo keda agregá pa duna instrukshon musikal pa e sekshon aki.
E proyekto pa formashon musikal den bario a start  1e di ougùstùs 2005, ku un método ku IpFM a skibi, pa laga muchanan siña muzik i toka un instrumènt den grupo.
Ya despues di promé aña hóbennan ku talento, por duna un presentashon, ku un repertorio di piesanan ménos kompliká.
Durante 13 aña e sistema aki a duna su fruta i a resultá mas efisiente i eksitoso, ku e métodonan tradishonal.
Vários di e hóbennan ku a haña lès den e proyekto aki, ta forma parti di diferente agrupashon musikal hóben i adulto.
E studiantenan ku tin e kapasidat i ambishon pa sigui estudionan musikal mas avansá ta forma parti di Junior All Star, i ku ta demostrando nan habilidat durante presentashonnan grandi manera Festival di Tumba i festival , Un kanto pa Kòrsou.

Inskripshon
Entrante 26 di yüni 2018, tur e  hóbennan di e barionan rondó di Sambil i esnan di otro bario ku tin transporte, por pasa na ofisina di Sambil, na Escalante o na Festival Center, pa yena formulario di inskripshon. Tantu gerensia di Sambil , Amak i Instituto pa Formashon Musikal,  lo trata na tene tarifa di lès mas abou posibel (fls,7,50), pero si tin  mayornan ku  no por paga, lo no ekskluí e alumno aki pa partisipá.
E instrukshon musikal den e disiplinanan menshoná ta kostoso.
Pa e hóbennan ku demostrá nan kapasidat riba un òf otro instrumènt lo wak un forma pa  e por yega na su propio instrumènt.