ANKARA, TURKIA, AFP.- Forsanan militar turko a kuminsá sali for di Afganistan segun informashon di e ministerio di Defensa, bandonando nan plan pa protehá aeropuerto di Kabul.
“Forsanan armá turko lo regresá nos patria, orguyoso di a kumpli ku a tarea ku nos a duna nan”, asina e ministerio a señalá den un deklarashon.
Turkia tin mas di 500 sòldat ku ta forma parti di NATO den Afganistan.
Ankara tabata negoshando tantu ku Merka komo e talibannan pa yuda ku vigilansia den aeropuerto despues di retirada di trupanan merikano ku mester sosodé djamars. Pero e talibannan a avansá rápidamente i a desbaratá tur plan.
Presidente turko Recep Tayyip Erdogan a bisa ku “ta importante pa Afganistan stabilisá. Turkia lo sigui ku tur diálogo pa logra e meta aki”.
