WILLEMSTAD.- Djasabra dia 28 di sèptèmber porfin e soño di hopi fanátiko ta bira realidat. Frank & Friends original lo ta huntu atrobe pa un solo presentashon.
For di Ulanda lo tei Titiriti i Fakir; for di Aruba, Jersey Isenia i Zeyo Davelaar ya ta na Kòrsou.
Ya preparashonnan ta den ‘full swing’ pa e anochi pa historia aki, ora ku legendario banda ku a kousa estrago den dékada 80 presentá den e tremendo fiesta ‘The Legends’. Huntu ku Frank & Friends, riba e anochi ei lo tin tambe presentashon di Rizam i MAIS.
Den pasado na vários okashon, diferente promotor a trata na trese Frank & Friends huntu, maske ta pa un biaha, pero no a logra. Pues djasabra 28 di sèptèmber den Villa Royal nèt dilanti Waaigat, definitivamente tei bira un anochi pa historia.
Karchinan pa e tremendo anochi di ‘THE LEGENDS’ ta na benta na Beep Beep, Frank Curiel Ball Park den Santa Maria, Mensing’s Caminada i na 24 Uur uit de Muur.
Tur kos ta start for di 8pm te 3am, pues prepará pa bo rekordá dushi tempunan di kadans ora e legendario bandanan Frank & Friends original, Rizam i MAIS bini huntu un biaha mas riba djasabra 28 di sèptèmber den Villa Royal.