SIUDAT VATIKANO, AP.- Un di e seis hòmbernan ku ta akusá e embahador di Vatikano na Fransia di a mishi seksualmente ku nan, a presentá su denunsia den Vatikano despues di a sigurá ku Santa Sede a invoká su inmunidat diplomátiko den e investigashon penal franses.
Mathieu De La Souchere a reuní ku un di e asesornan di Papa Fransisco, enkargá ku kasonan di abusu seksual, despues ku el a entrega un keho na Paris, na komienso di aña. E ta akusá arsobispu Luigi Ventura di mishi kuné repetidamente den públiko durante un resepshon ofisial riba 17 di yanüari na stadhuis di Paris, kaminda e ta traha.
Fiskal di Paris ta investigando e agreshon seksual aki. Vatikano a bisa ku Ventura ta koperando. Pero De La Souchere a señalá ku e kaso na Fransia ta praktikamente stanka dor di e tema di inmunidat.
E website katóliko Crux a indiká ku seis persona a señalá ku Ventura a mishi ku nan den transkurso di su labor diplomátiko, kual ta inkluí mishonnan na Canada i Chile.
