RIO DE JANEIRO, BRASIL (AFP).- Polis brasilero a anunsiá un operashon pa detené dos eks gerente dje gigante pakus Americanas, sospechosonan di froude di alrededor di 4.600 mion dòler.
Un tribunal di Rio de Janeiro a emití “dos òrdu di detenshon i diessinku registro”, segun polis federal a indiká, sin a duna identidat dje personanan ku ta keda buská. E operashon ta konta ku kasi 80 agente.
Segun vários medio brasilero, e órdennan di aresto ta di Miguel Gutierrez, eks-presidente di Americanas, i Anna Christina Ramos Saicali, eks direktor dje empresa, kendenan lo ta pafó dje pais.
Hustisia a determiná ademas e blokeo di mas di 500 mion real (90 mion dòler) di eks-miembronan di direktiva dje grupo.
E investigashon a tuma lugá ku kolaborashon dje gerensia aktual dje empresa, ku djaweps a bisa den un komunikado di tin “konfiansa total den outoridatnan”.
Americana, gigante di benta via di internèt komo tambe físikamente i ku aktualmente tin mas di 1.700 pakus den Brasil, ta bisa di ta “víktima di un froude di su eks gerensia, ku a manipulá di forma konsiente ku kontròlnan interno”.
Segun polis, e froude di sifranan a subi te na 25.300 mion real, alrededor di 4.600 mion dòler na e kambio aktual.
Esei a permití pa presentá resultadonan ku na un manera artifisial a hisa balor di merkado dje empresa.