KRALENDIJK – Plataforma Kultural pa algun tempu kaba tin un proyekto pa fasilitá un proseso pa arte i kultura bai skol. Den e kuadro aki Bòi Antoin i Emma Pratt di Fundashon Históriko Kultural Boneriano (FuHiKuBo) tabatin un reunion e siman aki ku Marieke Knol i Ghislaine Monte di Plataforma Kultural.

No tin duda ku FuHiKuBo por hunga un ròl den e proyekto aki. A diskutí e proyekto entamá aki pa Plataforma Kultural, ku ta hopi aktivo riba tereno kultural. Asina nan tin por ehèmpel un sitio yamá ‘Hòfi Kultural’ den Antriol Pabou, na unda ta tuma lugá vários aktividat.

Ta hopi hopi importante pa arte i kultura bai skol. Marieke Knol a duna splikashon di e inisiativa. Bòi Antoin a splika kon e ta visualisá ku FuHiKuBo por duna un aporte i hunga un ròl den e proyekto.

Emma Pratt desde algun tempu kaba ta fungiendo komo lider di proyekto pa FuHiKuBo. Despues di e reunion Marieke Knol di Plataforma Kultural, huntu ku Ghislaine Monte, a entregá algun buki tokante edukashon kultural na Emma, kende ta supervisá e biblioteka di FuHiKuBo.