WILLEMSTAD.- Ayera tabatin e promé aktividat kaminda e muchanan ku a inskribí pa Festival di Tumba Hubenil mester a interpretá un tumba eksistente, pa asina midi nan nivel riba: 1. Entonashon; 2. Ritmo i 3. Presentashon.
Esaki ta pa sa dirigí unda tin ku duna e partisipante mas sosten i guia pa asina por kompetí na e siguiente aktividat ku lo tin dia 2 i 3 di novèmber próksimo, kual ta e aktividat di preselekshon.
Durante di aktividat aki lo selektá e 15 finalistanan pa e Festival di Tumba Hubenil 2019.
Tur mucha ta risibí un feedback di nan presentashon di ayera, kiko lo traha riba dje i si e no ta alkansabel pa traha riba dje pa e aktividat di preselekshon, e ta risibí e feedback i guia nesesario pa e partisipá un próksimo biaha.
E kolaboradornan ku a husga e kriterionan tabata Ravello Antoin (ritmo i totalidat), Joeallys Pietersz (entonashon)  i Etnaica Lucas (presentashon).
E dianan ku ta bin ta enfoká riba e guia nesesario pa kada partisipante. Fundashon Alelimo ke a yama un danki na NAVU pa su koperashon.