WILLEMSTAD.- Ya nos a kore drenta e simannan di e marchanan di Karnaval 2018. I pa djadumingu awor ya nos muchanan ta bai desfilá nan trahe pa e públiko ku lo bin pa atmirá nan.
E marcha lo sali pa 3’or di mèrdia for di Rotònde Plasa Hariri.  Fundashon J.A.G. ta hasi un súplika pa tur e Radio Emisoranan, Lidernan i nan grupo, Vehíkulonan mester ta presente dos ora promé na salida i esaki ta obligatorio.
Pa asina por pone tur e gruponan segun nan numerashon. I pa por sali na tempu. E ruta pa ku e Marcha Hubenil ta sali for di Plasa Hariri, sigui e direkshon di Marchena / Wishi, Habaai, Weg naar Welgelegen subi Plantesrust, drenta Hanchi Polar bai direkshon di Roodeweg, pasa dilanti Colon i drenta Breedestraat / Otrabanda i bai terminá na Rotònde Lucina Da Costa Gomez.
Nos ta spera ku ta duna espasio pa e muchanan por lusi i gosa di nan marcha, mayornan kòrda wak nos muchanan durante di marcha ku ta para na  kantu. Laga nos ban komportá nos manera un Bon Yu di Kòrsou, pa asina nos no mester tin niun sorto di insidente pa lamentá.
Fundashon J.A.G. ta deseá tur mucha un Felis Karnaval i un tremendo Marcha Hubenil 2018.