WILLEMSTAD.- Durante di e anochi di premiashon Fundashon JAG a tuma e oportunidat pa yama danki na algun spònser ku tabata presente pa e konfiansa, sosten i a hinka nan skouder bou di e proyekto Karnaval, asina engrandesé nos fiesta kultural.
Tambe Fundashon JAG yama danki na e “Pila di Karnaval 2019” ku ta Coca Cola. Sr. Gustavo di Coca Cola a risibí e rekonosimentu pa tur e aña nan ku e kompania a bin ta duna su aporte na Karnaval di Kòrsou. E la risibí e regalo for di man di sra. Minister Alcalá-Wallé i Juni Aniceta.
Riba e anochi aki tambe a duna un rekonosimentu spesial na Dj Argenis Huerta ku tin mas ku 25 aña konsekutivo poniendo ambiente den Marchanan, hasta ora ku e tabata sufriendo di kebrante di salú el a toka pa su gruponan i e pueblo di Kòrsou huntu ku su team.
E tambe a risibí su regalo for di man di sra. Minister Alcalá-Wallé i Juni Aniceta.
Riba e fotonan por tuma nota di e momentonan aki.