WILLEMSTAD.- Fundashon JAG a haña e mandato ofisial for di man di Minister sra. Marilyn Alcalá-Wallé pa organisá Karnaval 2019. For di un par di luna kaba a bin ta traha riba diferente plannan pa ku Karnaval 2019.
Den kuadro di esakinan Fundashon JAG ta habri for di awe ofisialmente inskripshon pa partisipantenan na elekshon pa Marcha Hubenil, Parada di Tiner, Marcha Grandi i Festival di Tumba Hubenil 2019 pa kantante i kompositor.
Si bo ta un hóben òf adulto disiplina, aktivo, sosial i ku stima Karnaval ku ta parti di nos Kultura, bo por inskribí pa asina forma parti di e sertámennan pa ku embahadornan pa nos Marchanan di Karnaval i Festival di Tumba Hubenil 2019.
Pa elekshon Hubenil edat ta 7 pa 12 aña, elekshon Tiner ta 13 pa 17 aña, no mag di tin yu, pa elekshon Adulto for di 18 aña i por tin yu. Sea bo ta forma parti di un grupo, organisashon òf individual bo por partisipá.
Inskripshon ta sera dia 23 di sèptèmber próksimo. Keda pendiente pa nos anunsiá unda i kon nos lo klousura e inskripshon di un forma karnavalesko.
Pa por inskribí pa e tres elekshonnan por manda bo inskripshon na: inskripshon.jag@hotmail.com Pa mas informashon por tuma kontakto na telefòn 526-0475 òf 685-0475.
Tuma bon nota di tur informashon, pasó ora sera inskripshon lo no por aseptá mas partisipante.