WILLEMSTAD.- Manera nan a primintí dia nan a tene nan rueda di prensa, awe por anunsiá ku Fundashon Karnaval di Banda Bou a paga tur DJ pa nan trabou di animashon musikal durante di Karnaval 2019. Awe e banda ONE lo risibí su pago i ta pendiente tambe pa paga e debe habrí serka dos kompania di bùs i algun hende ku tin ku kaba di risibí un montante chikí di FKBB.
‘Louie Louie’ a kombersá ayera nochi ku Lisette Jansen, presidente di FKBB i el a indiká di ta kontentu ku a logra paga e debenan ku tabata habri.

KARNAVAL 2020
Pa loke ta trata Karnaval di Bándabou, FKBB ta kere ku nan lo yega na 12 pa 13 grupo partisipando. ‘Ayera nos a reuní pa wak kuantu sèn tin pa dje forma ei nos sa kuantu dj i òf banda lo por pone pa Karnaval di Bándabou’, asina Lisette a splika.
‘Tin gruponan ku a indiká ku nan mes lo kubri gastunan di konvoi. Pa djaweps awor nos ta sera e inskripshon i na e momentu ei nos lo sa di forma definitivo kuantu muzik tin mester.
Nos tin konfirmá e partisipashon di Excellence Band i ta pendiente pa kaba di regla nan sistema di zonido pa nan’.
Despues ku tabatin duda ku lo por a selebrá Karnaval 2020 na Bándabou apesar di tur e retonan, lo tin selebrashon di Karnaval na Bándabou.
Manera ta konosí Polis no a duna pèrmit pa e gruponan di kabai djòin e marcha. Awor FKBB a kuminsá risibí petishon dje gruponan pa nan partisipá na e marcha sin nan kabai, esaki djis pa nan haña e oportunidat pa por bolbe ‘show’ nan trahe.

MARCHA DI SKOL
E Marcha di Skol dje aña aki na Bándabou a bira mas chikí. Tin algun skol ku a kanselá nan partisipashon loke a pone ku e kantidat di partisipante lo ta mas o ménos 1000 mucha. Aña pasá tabatin partisipashon di 3 mil mucha.
E situashon no ta esun di mas mihó na Kòrsou. Danki Dios ku no a bai stens riba spònsernan.
FKBB i su tim di transishon ta kontentu ku nan ta logrando pa por kumpli ku tur loke nan a primintí.