WILLEMSTAD.- Dia 2 di yüli próksimo, Fundashon Kultural Banda Bou ta selebrá, manera ya a bira un tradishon, “Dia di Bandera” di Kòrsou. Esaki lo ta e di 33 aña di e gran fiesta aki.
Manera semper lo kuminsá pa 1’or di mèrdia ku un parti ofisial ku ta konsistí di: Entrega di Bandera na enkargo di sra. Chela Kwidama, Srta. Chanistica Cicilia, Reina Seú 2-17, ta risibí e bandera i na su turno ta pas’é pa e kandidatanan di Reina Seú 2017 ku lo kana bai kuné na e palu di Bandera. Bendishonamentu di Bandera lo keda efektuá pa pastor Raul.
Nos Bandera lo keda hisá pa e pareha Edrid i Elma Miguel. Despues di kanta himno i felisitashon, diskurso di órden na enkargo  di Minister, Sra. Marlyn Alcalá-Wallé i palabranan di gradisimentu na enkargo di presidente di Fundashon Kultural Bou, Sr. Rutilio “Rudy” Rooi.
Tur e parti aki lo keda interkambiá ku kantikanan presentá pa duo ‘For God We Sing’, bou di enkargo di Aivi Rosalia-Stacie.
Lo kontinuá ku un bríndis pa invitadonan te 3’or i e parti sosial kultural.
Pa e parti sosial kultural lo tin presentashon di entre otro: Típiko Nos Tesoro bou di direkshon di Marcel Hoyer di 2’or i mei te ku 5’or; 5’or pa 6’or di atardi Mariachi Del Rey; 6’or pa 8’or di anochi Classic XD i pa finalisá e anochi, presentashon di Aya i su Grupo for di 8’or pa 10’or di anochi.