WILLEMSTAD.- Pa Fundashon Kultural Sembra Alegria ta sumamente nesesario pa nos kuminsá apresiá nos herensianan kultural i tambe nos historia.
P’esei Fundashon Kultural Sembra Alegria ta un fundashon ku ta kontribuí na krea talentonan i stimulá mas amor pa nos historia i kultura serka nos hóbennan. Esaki ta logrando pa medio di e diferente organisashon ku nos tin manera ; Grupo Folklóriko Sembra Alegria, Grupo di Seú Sembra Alegria, The Jolly Jokers Vacation Club, S.A. Carnival Group i Grupo Folklóriko Sembra Alegria Hubenil.
Bou di guia di lider, Viviana Braafhart, e komishon, konsistiendo di hóben a i ta organisando diferente aktividat i un di e aktividatnan aki lo ta “Marcha di Balòn”.
Marcha di balòn ta diferente den tur sentido. E ta paresido na loke ku tabata sosodé den pasado kaminda damsnan tabata sali kas ku nan balòn i un bela aden, pa asina nan por a iluminá kaminda. Nan tabata topa otro pa huntu kana yega fiesta di Balòn.
Esaki ta loke Fundashon Kultural Sembra Alegria kier ilustrá den kaya dia 28 di sèptèmber próksimo. Dal bo trahe folklóriko i krea bo propio balòn pa nos ban lusa kaya.
Saliendo  6.30 p.m. for di Festival Center, lo wapa riba Kaminda George Willems; Kaya Dominico Herrera; Kaya Edgar Supriano i Ronde Klipweg  p’asina terminá na Hòfi Barbolina kaminda lo bai tin animashon di: Den Chikí, G.R.I.K., Sablika, Limania i Grupo Orírí for di 8 or di anochi te 1 or di mardugá.
Entrada pa e marcha i den hòfi lo ta grátis, bar i kushina lo ta bon di stòk.
Pueblo bo ta keda kordialmente invitá. Pa mas informashon por tuma kontakto ku sra. Braafhart na 511-7318 òf 518-5338.